Nagpanindugan ang isa ka Human Rights Lawyer nga mahimo gid nga dakpon sang otoridad si Senator Ronald “Bato” Dela Rosa bangud sa kaso nga ginapangtubang sini nga crimes against humanity sa gahom sang warrant of arrest nga gin paguwa sang International Criminal Court.
Ini ang gin hatagan sang ligwa ni Atty.Neri Colmenares – Human Rights Lawyer/Former Bayan Muna Representative sa interview sang Bombo Radyo Koronadal.
Suno kay Atty. Colmenares, mahimo nga dakpon pinaagi sa ICC Arrest warrant si Dela Rosa kag may ara sang katungod ang mga law enforcers nga e-implementar ang nasambit nga warrant of arrest.
Ginpahayag pa sini nga kun ultimo kag pigado ang isa ka Pilipino daw sa kadali lang sa mga otoridad nga magdakop sang mga ini apang kun ang dalakpon naman amu ang isa ka mataas nga opisyal sang gobyerno ngaa daw kulukasubong nga kadali nga magpalusot ukon magpamalibad ang mga ini.
Dugang pa sini, labi na nga mas dalakpon ang senador kasunod man ang pag deny sang Korte Suprema sa hangyo sini nga Temporary Restraining Order (TRO).
Liwat nga magapasa sang motion for reconsideration ang kampo ni Senator Bato Dela Rosa matapos wala ginpaboran sang Supreme Court ang iya hingyo nga Temporary Restraining Order matapos ang arrest warrant sa iya sang International Criminal Court.
Suno pa sa ila, indi pa final ruling ang ginpaguwa nga resolusyon sang Korte nahanungod sa legality sang implementasyon sang ICC process sa pungsod.
Suno naman kay Atty. Israelito Torreon, abogado sang Senador nga himuon nila ang tanan nga pwede mahimo sa idalom sang layi.
Nahibaluan nga kahapon nga adlaw, ginbasura sang Korte Suprema ang una nga mosyon ni Sen. Bato Dela Rosa nga nagahingyo nga mag-isyu sang Temporary Restraining Order agud punggan ang mga otoridad nga ipatuman ang ‘arrest warrant’ gikan sa International Criminal Court.
Sa boto nga 9-5-1, wala ginpamatian sang Korte Suprema ang hingyo ni Dela Rosa.
Samtang, pagatun-an naman sang National Bureau of Investigation ang desisyon sang Supreme Court sa pagbasura sang dugang nga Temporary Restraining Order (TRO) ni Senator Ronald Dela Rosa para protektahan batok sa warrant sang International Criminal Court.
Suno kay Atty. Palmer Mallari, spokesperson sang NBI, permi sila nga nakahanda sa anuman nga tion agud maaresto ang Senador.
