Ginpasuspinde anay sang Senate Blue Ribbon Committee ang imbestigasyon may kaangtanan sa gin-aalegar nga mga anomalya sa mga flood control projects. Suno kay Senador Panfilo Lacson, wala anay pagahiwaton nga pagdinig sa masunod nga semana, matapos nga nabal-an nga indi pa handa ang mga dokumento nga ginapangayo nila sa Department of Justice (DOJ) kag sa Manila Regional Trial Court (RTC).
Nakaset tani ang pagpulong sang panel sa Oktubre 8, nga orihinal nga ginplano sa hangyo ni Senador JV Ejercito agud ipatawag si anay DPWH Regional Director IV-B Engr. Gerald A. Pacanan.Dugang pa, may sabay nga pagpulong para sa budget kag sa Commission on Appointments (CA), nga mahimo magresulta sang conflict sa schedule sang komite. Bangud sini, ginpahibalo ni Lacson kay Senate President Vicente “Tito” Sotto III ang temporaryo nga pagkansela sang pagpulong tubtob nga mag-abot ang mas angay nga panahon kag kompleto na ang mga dokumento.
