Paga-imbestigaran na sang Senado sa July 1 ang natabo nga shooting incident sa isa ka eskwelahan sa Tacloban City sa diin tatlo ka mga estudyante ang napatay.
Pagapangunahan ni Committee on Women, Children, Family Relations, and Gender Equality Chairperson Senator Risa Hontiveros ang imbestigasyon sa masunod nga Miyerkules, July 1, sa diin nalakip man sa mga lantawon ang nagadako nga pamahog sang online radicalization sa kabataan.
Suno kay Hontiveros, liwat nga pagabuksan ang hearing sa diin usisaon sang komite kon may papel ang mga online platforms para ma-brainwash kag ma-radicalize ang mga bata para makahimo sang kalakasan.
Gintumod sang senadora ang nauna nga imbestigasyon sang April 14 sa diin nabuyagyag na ang mga online platforms kag usaron ang gaming spaces nga ginaalegar nagamit sa pag-groom, pagmanipula kag pag-radicalize sang paminsaron sang kabataan sa kalakasan.
Lantawon sang mamalidha kon may nagakaigo nga ginahimo ang tanan nga online platforms para indi maabuso ang kabataan.
Pahayag ni Hontiveros, nga kon ginagamit ang internet para biktimahon ang mga bata, dapat lang nga may manabat kag indi lunsay kita lang ang ginatutukan sang mga big tech companies.
