Nagpanawagan si Sen. Francis “Kiko” Pangilinan nga maghimo gilayon sang tikang ang gobyerno agud masiguro ang kaluwasan sang mga Pilipino sa Middle East matapos ang pag-atake sang US kag Israel sa Iran.
Gipanawagan niya ang mga embahada sang Pilipinas sa rehiyon nga ipatuman gilayon ang crisis protocol para sa ginabulubanta nga duha ka milyon ka mga Pilipino nga nagaubra kag nagaestar didto, lakip ang yara sa Iran.
Gin-awhag man niya ang mga opisyales nga magpakig-angot gilayon sa mga community leader agud mapahapsay kag mapadasig ang evacuation ukon repatriation sang mga OFW kun kinahanglanon.
Gindugang man sang senador nga indi lamang seguridad ang dapat tutukan kundi lakip ang posible nga pagsaka sang presyo sang gatong sa pungsod.
Bangud sini, ginpanawagan niya ang pagpatuman sang fuel subsidy para sa mga tsuper sang tricycle, jeepney kag bus, lakip sa mga mangunguma kag manugpangisda nga nagasandig sa diesel para sa ila traktora kag bangka.
Dugang pa niya, dapat man nga temporaryo nga suspindiron ang excise tax sa diesel kag kerosene agud mahagan-hagan ang dugang nga krisis sang mga konsyumer.
