Nagdepensa si Senator Jinggoy Estrada sang Sabado bahin sa iya pahayag sa romantic relationships ni Elizabeth Means, isa ka Amerikana nga basketball player, kag ginpahayag nga friendly banter lang ini kaupod si Senator Kiko Pangilinan.
Nag-umpisa ang isyu sang nagpamangkot si Estrada kay Means sa hearing sang Committee on Justice and Human Rights sang Marso 3 bahin sa iya aplikasyon para sa naturalization, kun may Pilipino nga karelasyon ini.
Nag-apply si Means sang Philippine citizenship bilang kabahin sang plano niya nga magrepresentar sa Pilipinas sa international basketball competitions, lakip na ang 2028 Olympics, kag isa man siya ka prospect sang Gilas Pilipinas Women’s 3×3 team.
Suno kay Estrada, naisip niya ang pamangkot matapos ang pahayag ni Maodo “Malick” Diouf, isa man ka basketball player kag naturalization candidate, nga may Filipina nga karelasyon.
Ginpahayag niya nga kabahin ini sang pag-imbestiga sang Committee agud masiguro kon seryoso ang aplikante sa pag-estar kag pagtukod sang pamilya sa Pilipinas.
