Gin-estriktuhan na karon ang pagpatuman sang checkpoint sa nagkalain-lain nga lugar sa Region 12 matapos ang serye sang pagpamusil sa sini nga Christmas season kon sa diin pila sa mga biktima ang ginbawian sang kabuhi lakip na ang duha ka kandidato kag isa ka Asst. election officer.
Ini ang ginpahayag ni PMajor Rissa Hernaez, tigpamaba sang PNP Region 12 sa panayam sang Bombo Radyo Koronadal.
Suno kay Hernaez, handa na ang halos duha ka libo nga mga PNP personnel nga i-deploy sa mga simbahan, transportaton hubs, terminal commercial areas kag mga areas of convergence agud masiguro ang kaligtasan sang mga pumuluyo.
Sa pagkamatuod, kabahin ini sa nakapreparar nga security plan sang PNP para sa pagmentinar sang peace and order sa Socsksargen.
Madumduman nga sa naitala nga sunod-sunod nga kaso sang pagpamusil-patay sang riding-in-tandem suspects sa mga lugar sa Region 12, may tatlo ka kaso karon nga ginaberipika kon maituturing bala nga election related incident.
Ini ang nagalakip sang ginpatay nga Vice Mayoralty candidate sa Tantangan, South Cotabato, Asst. Election Officer sa Isulan, Sultan Kudarat kag kandidato sa pagkagobernador sang Saranggani province.
Apang, suno kay Hernaez, pawang mga personal nga motibo ang mas mabug-at nga rason sa pagluthang patay sa mga biktima kay indi ini matumod nga mga election related incidents ang mga ini.
Sa karon, prayoridad sang PNP ang pagsiguro nga indi na masundan ang mga kaso sang pagpatay sa mga lugar sa Soccsksargen kalakip ang pagsiguro nga masolbar ang tanan nga mga kaso sang pagpatay kag mapasakaan sang nagakaangay nga kaso ang mga imbolbar nga mga suspek.
Ginpasiguro man sang kapulisan sa Region 12 nga nagabantay sila sa ano man nga mahimo mahitabo ilabi na nga prayoridad ang peace and order sang mga pumuluyo sa bug-os nga rehiyon dose.
