KORONADAL CITY- Nakabatak sa gihapon ang alerto sa bug-os nga siyudad sang Koronadal makaligad ang pagsigabong sang isa ka improvised explosive device (IED) kag pagkarekober sang isa pa ka bomba sa bahin sang Upper Osmena St diri sa siyudad.
Sa nagapadayon nga imbestigasyon sang Koronadal City PNP, posible nga pananabotahe ukon pagpanghadlok ang motibo sang mga suspek.
Una nito, nakabati sang ila trabahante sa isa ka establishmyento ang pagsigabong malapit sa ila sadtong Sabado nga gilayon nila nga gin-report kag ginrespondehan sang South Cotabato Explosive Ordnance Disposal Team.
Sa pagresponde sang EOD team sa nagluntad nga pagsigabong, narekober pa ang isa ka bomba nga ginsulod sa itom nga bag nga gilayon nga gin-detonate.
Nahibaloan nga gindungan ang insidente sa pagtakop sang Koronadal International Folklore Festival kun sa diin madamo nga mga dumuluong ang dinapit nga bisita sa nasambit nga aktibidad.
Kun madumdoman, sang nakaligad nga mga binulan, ginpalukpan man sang bomba ang Christ the King Cathedral nga ginkapilas sang pila ka tawo kag ginatudlo ang Bangsamoro Islamic Freedom Fighters nga yara sa likod sini.
