KORONADAL CITY – Hustisya ang ginasinggitan sang pamilya sang ginapatihan nga drug suspect makaligad suno pa ini nga ginpatay sang mga operatiba sa ginpatigayon nga search warrant operation sa Prk. Poticar, Brgy. GPS, Koronadal City.
Sa interbyu sang Bombo Radyo Koronadal kay alyas Toto, indi suno pa makatarungan ang ginpatigayon nga operasyon sang mga otoridad kun sa diin hinali na lamang ginguba ang pwertahan kag mga appliance kag ginluthang ang iya utod nga si Rannie Junsay nga residente sang nasambit nga lugar.
Suspetsa sini nga planted ang nasambit nga operasyon bangud wala sang armas si Rannie apang may nakit-an ang iya asawa nga si Mylene nga isa ka itom nga sling bag nga ginbutang sang mga otoridad sa crime scene samtang ginapaguwa sa ila puloy-an.
Narekober sa nasambit nga operasyon ang mga sachet sang ginapatihan nga shabu.
Abri naman ang waragwagan sang Bombo Radyo sa bahin sang kapulisan angot sa natabo.
