Padayon subong ang ginahimo nga search and rescue operations sa tatlo ka barangay sa Bagumbayan, Sultan Kudarat matapos ang pagluntad sang mabaskog nga ulan nga nagtugas sang flashflood kag mudflow sa lugar.
Ini ang ginpahayag ni Jorie Mae Balmediano, tagpamaba sang Office of Civil Defense (OCD) Region 12, sa isa ka interbyu sa Bombo Radyo Koronadal.
Suno kay Balmediano, tatlo ka barangay ang apektado sa nasambit nga kalamidad. Ang Barangay Poblacion kag Masiag ang ginbaha, samtang sa Barangay Chua, nagluntad ang pagdahili sang duta (landslide).
Ginapadayon pa subong ang assessment kag ginahulat ang kompleto nga datos parte sa mga naguba nga kabalayan kag iban pa nga detalye.
Gindugang pa ni Balmediano nga kun luyag maghatag sang bulig ukon donasyon sa mga apektado, ginapangabay sang lokal nga panguluhan nga makig-angut sa municipal department offices sang Bagumbayan agud mahatagan sang husto nga giya.
Sa subong, magapadayon ang pagmonitor sang mga otoridad sa lugar samtang ginapatuman ang mga clearing kag relief operations
