Nagapadayon ang imbestigasyon sang mga otoridad sa pagpangluthang sa isa ka principal sa bahin sang Barangay road, Barangay Kapinpilan, Kadayangan, Special Geographic Area (SGA), BARMM. Agosto 20, 2024.
Ginkilala sang mga otoridad ang biktima nga si Aurora Bayog Ledda, 51 anyos, may asawa, Teacher III, OIC Principal sang Kapinpilan High School kag residente ng Midsayap, Cotabato.
Naguwa sa imbestigasyon sang Midsayap PNP nga magasulod na kuntani sa eskwelahan ang principal kag angkas sini sakay sang single nga motorsiklo nga ginamaneho ni Alyas Cora sang ginbalabagan sang duha ka lalaki nga nakamotorsiklo man kag ginluthang sang makaduha ka bes ang biktima.
Nag-angkon ini sang igo sang bala sa iya nga lawas samtang wala naman gintiro ang kaupod sini.
Narekober sang mga pulis sa crime scene ang isa ka basiyo sang fired cartridge sang cal. 45 pistol nga gingamit sa pagtiro sa biktima.
Sa karon, ginahibalo pa kun ano ang motibo sang pagpangluthang kag ang identity sang mga suspek.
