KORONADAL CITY – Nagapadayon ang imbestigasyon sang mga otoridad kaangot sa pagpangluthang patay sa isa ka district school supervisor sa national highway sang Pres. Quirino, Sultan Kudarat.
Ginkilala ang nasambit nga biktima nga si Abdulkadir Sultan, kag residente sang Purok KWM Barangay Poblacion sang nasambit nga banwa.
Sa interbyu sang Bombo Radyo Koronadal kay alyas Jean, isa sa mga testigo sa nasambit nga krimen, nakaangkon sang igo sa ulo kag dughan si Sultan samtang sakay sang iya itom nga Sportivo nga nangin rason sang pagkapatay sini.
Pakadto suno pa ini sa buluthoan para sa isa ka seminar sang nagluntad ang insidente.
Suno kay Jean, posible nga mga riding-in-tandem criminals ang may kahimoan sa pagpangluthang.
Sa subong ginahibalo na sang kapulisan ang motibo sa insidente kag hot pursuit operation batok sa mga suspek.
