Gin-engganyo ni anay presidential legal counsel Salvador Panelo si anay Presidente Rodrigo Duterte nga magpapili nga bise-presidente sa 2028 para mangin running-mate sang iya anak nga si Vice-President Sara Duterte.
Ginpahayag ni Panelo sa isa ka press conference nga regular sila nga naga-istoryahanay sang anay Presidente kag isa siya sa nagaduso sang Duterte-Duterte tandem sa 2028.
Panugyan ni Panelo sa anay Presidente nga magpapili anay alkalde bangud kinahanglan siya sa Davao kag sa 2028, magpapili siya bise-presidente.
Ginpasiguro man niya nga kun Duterte-Duterte, magabalik ang tanan nga nagkalas sa ila bangud sa mabaskog nila nga tandem.
Suno pa kay Panelo, wala man sang derekta nga sabat sa suhestyon niya si Duterte sa baylo, ginhambalan lang siya sini nga ipadayon ang adbokasiya nga Duterte-Duterte.
