KORONADAL CITY- Ginhatagan punto sang Department of Health region 12 pinaagi kay DOH spokesperson Jenny Ventura nga wala pa nila ginakonsiderar sa subong ang liwat nga pag-usar sang kontrobersiyal nga Dengvaxia vaccine.
Sa ekslusibo nga interbyu sang Bombo Radyo Koronadal kay Ventura, apesar nagdeklarar na sang Dengue epidemic sa pungsod, nagapaningkamot ang DOH nga magpatigayon sang alternatibo kag mas epektibo nga paagi agud matapna ang nasambit nga balatian nga nakaapekto na sa nilibo nga pumuluyo sa pungsod.
Kaangot sinii, indi nila igakompromiso ang salig sang mga Pilipino ilabi na sang mga ginikanan sang mga bata nga magsugot nga magpaidalom sa ila alternatibo nga vaccination program makaligad ang kontrobersiya nga ginakaulamiran sang DOH bangud sa Dengvaxia.
Kun madumdoman ginsuspinder sang DOH ang school-based dengue vaccination program makaligad nagpaguwa sang pahayag ang French drug-based vaccine maker nga Sanofi Pasteur nga may negatibo nga epekto ang Dengvaxia sa mga nabakunahan nga wala pa nakaangkon sang dengue infection.
Base sa datos humalin sang Hulyo 4, 2019 yara sa 142 ka tawo ang patay nga kadam-an mga bata nga ginasiling nga nabakunahan sang Dengvaxia.
