KORONADAL CITY – Nagapati ang National Task Force to End Local Communist Armed Conflict (NTF-ELCAC) nga ang pagtaliwan ni Joma Sison ang founder sang Communist Party of the Philippines ang katapusan naman kag pagkapatay sang tiko nga ideolohiya sang terorismo, kalakasan, pagpanghadlok, pagpatibusok sa gobyerno kag destabilisasyon nga pila ka dekada na sini nga ginapamunuan.
Ini ang ginpahayag ni Ka Eric Celiz, anay Kadre sang NPA apang nagakontra na karon sa CPP kag nagarepresentar sa Sambayanan kag NTF-ELCAC.
Suno pa kay Celiz, sa pagtaliwan ni Sison, liwat sila nga nagapanawagan sa tanan nga mga kaalyado sini kag mga myemrbo sang kilusan nga bayaan na ang kalakasan kag armado nga pagpakigbato sa gobyerno sa baylo magbalik sa sabak sini kag suportahan ang malinong kag matawhay nga pagpangabuhi.
Dugang pa sini, panahon na agud nga mahatagan sang oportunidad ang mga Pilipino nga mag-intindihanay, maghiliusa kag mag-upo sa isa ka maayo kag malinong nga pungsod nga malayo na sa kinagamo.
Dako man suno pa nga kawad-an si Sison bangud wala na sang makabig nga “unifying leader” ang CPP-NPA.
Samtang, liwat man nga ginpasiguro sang NTF-ElCAC ang ila nga commitment nga tapuson na ang communist terrorists group sa pungsod kag pabaskugon ang whole-of-nation approach.
