KORONADAL CITY- Pamatuod suno pa nga indi validated ang listahan nga ginpaguwa sang PDEA angot sa mga barangay officials nga involbado sa illegal nga droga partikular na sa 2 ka pangalan gikan sa South Cotabato kun diin ang isa sa mga ini may sala nga address.
Ini ang ginpahayag ni Tampakan Municipal Councilor Annadel Torrejos Magbanua sa eksklusibo nga interbyu sang Bombo Radyo Koronadal.
Suno kay Magbanua, indi siya halin sa Koronadal Proper Polomolok, South Cotabato kundi sa Barangay Tablu, Tampakan South Cotabato.
Aminado si Magbanua nga nahibaluan niya nga yara siya sa listahan sang Narco officials sang 2017 kag ginberepikar niya na ini kag ginlimpyuhan ang pangalan gikan sa mga PNP officials apang wala siya makapadala sang personal nga sulat sa PDEA.
Apang, 1989-2004 pa daw siya nagserbisyo bilang Barangay Official kag sa pagkamatuod pang-ika 2 nga termino niya naman ini bilang municipal councilor sang ila nga banwa rason nga natingala siya nga sa listahan nga ginpaguwa sang PDEA, barangay captain sa gihapon ang nabutang nga designasyon nia kag sala pa ang address.
Kaangot sini, magakonsulta si Magbanua sa iya nga abogado para sa pagahimuon nga tikang sa pag-upod sang iya pangalan sa narcolist sang PDEA.
Kadungan sini, gin-insiter man sang opisyal nga wala siya maimplikar sa illegal nga droga.
