KORONADAL CITY – Tubtob sa subong traumatic sa gihapon sa mga residente sang Eastern Visayas ang pagtay-og sang mabaskog nga magnitude 6.5 nga linog sa ila lugar.
Kaangot sini, ginsaysay sang isa sa mga survivor sang linog nga si Irene “Ai-ai” Muñoz sa Bombo Radyo Koronadal ang ila naeksperyensiyahan sang nagtay-og ang linog.
Suno kay Muñoz, sa tuman kabaskog sang linog kasubong nga daw nagasaot ang ila balay.
Tuman nga kahadlok ang nabatyagan sini gani nagtago ini sa idalom sang lamesa kaupod ang iya duha ka bata, hinablos kag kabulig sini.
Wala napunggan sang mga ini nga maghibi kag magpangamuyo sa Makaako nga luwason sila sa nasambit nga kalamidad.
Makaligad nagtahaw ang kapin duha ka minuto nga linog, gilayon sila nga nagkamang pagguwa sa ila balay.
Tuman man ang iya pagpasalamat nga wala sila napilasan ukon natabunan nga buhi sang mga debris.
