KORONADAL CITY- Ginalauman nga malab-ot na sang 3 ka magkasumpong nga tribo sa Buldon, Maguindanao makaligad maghilisugot ang mga ini sa ginpatigayon nga Islamic religious rites and signing of peace pact sa Camp Siongco, Awang Datu Odin Sinsuat, Maguindanao.
Ang away sa tunga sang Iranun clans ang natuldukan sa pagpanguna sang 37th Infantry Battalion kag 603rd Infantry Brigade sa pagpamuno ni Col Jesus B Sarsagat.
Nahibaluan nga naghilisugot ang tatlo ka tribo nga ginakabug-usan sang 6 ka pamilya nga tapuson na ang 15 ka tuig nga rido sa pagpanguna sang ila mga lider nga sandao Mamalakat, Taaral, Mamaco, Pacasma kag Wadia.
Makaligad ang ginpatigayon nga seremonya kag pagsinapol, naghilisugot ang mga ini kag nagpanumpa sa Holy Quran kag kay Maguindanao Governor Esmael “Toto” Mangudadatu mangin man kay 6ID Commander Major General Arnel B. Dela Vega kag iban pa nga local military officials nga indi na magahimo sang kinagamo kag agud malikawan na ang paglapnag sang dugo sa ila mga tribo.
Kadungan sini, ginsurrender sang 6 ka pamilya ang ila mga arams kasubong sang M14 rifle, M16 rifle, Garand rifles, homemade Barret sniper’s rifle, 12-gauge shot gun kag mga pampasigabong.
