Isa ang patay samtang naaresto naman ang isa pa matapos ang nagluntad nga engkwentro sa tunga sang riding-in-tandem suspects kag kapulisan nga nagapatigayon sang checkpoint sa Public Terminal sang Barangay Poblacion, Pikit, Cotabato, Sabado sang aga, Oktubre 12,2024.
Suno sa Pikit PNP, samtang nagapatigayon sang static patrolling kag schematic checkpoint ang pwersa sang 3rd PCPMFC, 1203rd RMFB 12, RMFB14 BARMM kag 90IB, PA sa Public Terminal nakit-an ang nagapadulong nga duha kawala pa makilala nga riding-in-tandem kag sang ginpalapitan agud nga pamangkuton, nagbunot ang mga ini sang armas kag ginpalukpan ang mga pulis.
Nagpalagyo man gilayon ang mga suspek matapos nga makapalupok sa mga otoridad gani ginlagas ang mga ini tubtob nga nakaabot sa Jasmine Catering sa Sitio Pogpog, Brgy. Poblacion, Pikit Cotabato kun diin natumba ang ginasakyan nga get-away motorcycle sang mga ini.
Wala sa gihapon nagpundo ang mga suspek kag nakig-engkwentro sa joint government PIKIT FORCES rason nga naigo ang isa sa mga ini.
Matapos ang engkwentro, ang napatay ang isa sa mga ini nga ginkilala kay “Alyas Arnel”, 24-anyos, may asawa, mangunguma kag residente sang Brgy. Balong, Tugunan, SGA BARMM samtang naaresto naman ang kaupod sini nga ginkilala kay Alyas Rasul”, 28-anyos, may asawa, mangunguma kag residente man sang Brgy. Balong.
Narekober sa possession kag control sang suspek nga si alyas Arnel, ang isa ka(1) unit sang caliber .45 pistol, Infinity model, nga may serial nos. 252518, kargado sang steel magazine nga may apat (4) ka bala sang caliber .45 samtang narekober sa possession kag control sang isa pa ka suspek nga si Alyas Rasul ang isa ka (1) unit sang caliber .45 pistol, Armscor .45, nga may serial number nga 317521, kargado sang steel magazine nga may duha ka (2) bala sang kalibre .45.
Sa karon, ginapaidalom sa interogasyon ang naaresto nga suspek.
Samtang, natukiban nga ang napatay sa engkwrntro ang ginakabig nga rank 10 Most Wanted person sa kaso nga pagpatay.
.
