KORONADAL CITY – Nakapreparar ang 6th Infantry Division Philippine Army sa posible nga retaliatory attacks ukon pagpanimalos nga pagahimoon sang nabilin nga mga miyembro sang Dawlah Islamiyah- Ansar Khilafa Philippines-Maguid Remnants terror group.
Ini makaligad napatay sa ginlunsar nga operasyon sang mga kapulisan kag kasuldadohan ang ila sub-leader nga si Arafat Bulacon alyas Maula sa Prk . 6, Brgy. Koronadal Proper, Polomolok, South Cotabato.
Sa interbyu sang Bombo Radyo Koronadal kay 6th ID spokesman Lt. Col. Anhouvic Atilano, ginpahayag sini nga ginalauman na nila ang nasambit nga senaryo gani ginpahugtan pa nila ang pagbantay sa mga entry kag exit points sa South Central Mindanao agud indi na sila makatuga sang kalakasan.
Sa subong ginkilala ang lima nga iban pa nga napatay sa nasambit nga engkwentro nga sanday: Rusdy Saladao alyas Jayton, Norman Insag Marot, Arsad Insag Marot, Abdulbayan Insag Marot kag Mananding Insag Marot.
Nahibaloan nga igadul-ong kuntani nila ang mga improvised explosive device sa nagkalain-lain nga bahin sang Mindanao gani gin-unahan na nila ini kag ginlunsar ang nasambit nga operasyon.
