KORONADAL CITY – Nagaka-igo ang bulig nga naga-abot sa banwa sang Tulunan, North Cotabato halin sa nagkalain-lain nga ahensya sang gobyerno kag iban pa nga grupo.
Ini ang ginpahayag ni Jenalyn Delasan, head sang Municipal Social Welfare ang Development Office sang Tulunan sa esklusibo nga interbyu sang Bombo Radyo Koronadal.
Suno kay Delasan, madamo na sang bulig nga nag-abot sa ila nga banwa kun sa diin nakabulig sa 5087 ka pamilya nga naapektuhan sang linog.
Nahibaluan nga sa nasambit nga numero, 3404 diri ang ginakabig nga partially damage ang ila nga puluy-an samtang 1683 naman ang totally damaged.
Ginhatagan punto man sini nga matawhay ang pagpapanghatag sang mga bulig kasubong sang pagkaon, tubig kag trapal nga kinahanglan sang mga residente kun sa diin ginalista gid ang mga nagasulod nga bulig kag ang mga lugar nga pagahatagan sang bulig.
Ini ang agud nga masiguro nga mahatagan ang tanan nga mga residente.
Nahibaluan nga wala sang evacuation centers sa banwa sang Tulunan apang lunsay mga evacuation camps bangud nagkalaguba naman ang mga gym.
Mas ginpili suno pa sang mga pumuluyo nga magpatukod sang palaypay sa gwa mismo sang ila nga puluy-an ukon sa open area.
