KORONADAL CITY- Lauman suno pa nga tuman ka dako nga balor sang kwarta ang kinahanglanon sa pagpatukod sa liwat sang nawasak nga syudad sang Marawi City.
Ini ang pahayag ni South Cotabato Governor Daisy Avance Fuentes sa interbyu sang Bombo Radyo Koronadal kun sa diin dako nga pondo suno pa ang kinahanglanon ilabi na para sa mga imprastraktura nga mga nawasak sa halos 5 ka bulan nga gyera sa tunga sang tropa sang gobyerno kag sang Islamic State of Iraq and Syria ukon ISIS-Maute.
Suno sa gobernadora, dako nga hangkat sa Duterte administration kun sa ano nga pamaagi matutukan ang pagkay-o sa liwat sang mga edifisyo, puluy-an kag ilabi na ang mga kabuhi sang pribado nga mga pumuluyo sang Marawi.
Dugang pa nga pinakadako nga problema man nga paga-atubangon amuh ang resettlement sang mga bakwit kun sa diin nagalaum nga indi mangin kuripot ang Duterte administration sa pagpatukod sang mga pagasayluhan nga mga puluy-an indi kasubong suno pa sang ginhimo nakaligad nga administrasyon sa mga biktima sang Yolanda nga halos sub-standard nga mga materyales ang gin-usar sa pagpatukod sang pagsayluhan nga puluy-an sang mga biktima nga nasayang lang.
Tion na suno pa ini nga ipakita sang kasamtangan nga administrasyon nga indi ini kasubong sang nakaligad nga administrasyon nga kasubong nga gindalukan ang mga biktima sang bulig.
