Kinahanglan hatagan ang mga lokal nga pamunuan sang regulatory power agud mapunggan ang mga pagmina ukon mga iligal nga banlas sa sulod sang ila AOR.
Ini ang nangin pahayag ni Mayor Leonard Escobillo – Tampakan, South Cotabato, angot sa isyu sang iligal nga banlas kag pagmina, sa interview sang Bombo Radyo Koronadal.
Suno kay Escobillo, wala sang gahum ang Local Goverment Units (LGUs) sa mga large scale mining bangud ini yara sa idalom sang Department of Environment and Natural Resources, apang ginpunto niya nga kinahanglan sang regulatory power ang mga LGUs agud mapunggan ukon matapna ang mga small scale mining.
Ini agud masiguro sang mga lokal nga pamunuan nga wala sang may malapas nga mga regulasyon kag protocol sa pagmina ang mga kumbuyohan kag indi mabutang sa halit ang ikaayong lawas, pangabuhian, kag kaluwasan sang kada pumuluyo.
