KORONADAL CITY- Nagalaum sa karun ang mga OFWs nga mangin ang mga recruitment agencies ang igapaidalum man sa imbestigasyon angot sa mataas nga numero sang mga gina abuso nga Pinoy workers ilabi na ang mga domestic helpers sa Kuwait kag mangin sa iban pa nga lugar sa Middle East..//Ini ang ginpahayag ni Gng. Analiza Batallones, isa ka repatriated OFW halin sa Kuwait nga residente sang Koronadal City.
Sa ekslusibo nga interbyu sang Bombo Radyo Koronadal kay Batallones, ginpahayag sini nga mangin sya ang biktima man sang abusado nga agency rason nga nangin TNT ini sa halos 7 ka tuig kag nagpauli nga may dis-abilidad makaligad maaksidente sa sulod sa presuhan.
Ginpahayag pa ni Batallones nga ang una nga ginpalapitan sang mga gina-abuso nga mga OFW amuh ang ahensya apang ang nagakatabo, wala sila ginapamatian kag sa baylo ginahadlok kag ginabalik ang mga ini sa ila abusador man nga mga amo.
Kasubong suno pa sang iya na-eksperyensyahan kun sa diin nagpalagyo ini sa iya nga employer makaligad nga ginhana sya nga luguson.
Apang sa baylo nga buligan sang ahensya nga makuha ang iya passport, visa kag iban pa nga dokumento sa iya nga employer ang ginpabay-an suno pa kag gin-akigan pa ini.
Ini apisar mabug-at sa iya nangin TNT, nagtrabaho sa isa ka parlor sa madugay nga tuig tubtob nadakpan sang mga pulis kag gindala sa Philippine Embassy.
Dugang pa na sa baylo nga papulion ini sa Pilipinas, ginsugo pa ini sang opisyal sang Philippine Embassy nga magtrabaho nalang anay bilang TNT bangud wala pa sang mabulig ang ila talatapan sa iya pagpauli.
Ginkalain pa sang buot sini ang pag-akig sa iya kag pagpabaya sang Philippine Embassy officials kag sa baylo nga sa deportation magpabilin, ginpreso ini sa mga presuhan sang kriminal apisar nagahulat na lang ini sang ticket papuli sa pungsod.
Sa karun kaupod na ni Analiza ang 3 sini ka mga kabataan kag nagalaum sa pag-ayo sang iya nabali nga tiil kag makabalik pa sa iban nga pungsod.
Determinado man ini nga pasakaan sang kaso ang local agency sini nga FSL Manpower and Promotion Services Inc. kag foreign placement agency nga Meshal Hassan Al Ahmad.
Kadungan sini nagpanawagan man si Annaliza kay Pangulong Rodrigo Duterte nga imbestigaran ang mga empleyado sang Philippine Embassy ilabi na ang ila ginahimo nga pagpabaya sa mga OFWs.
