Ginaduso liwat ni Senate Minority Leader Vicente “Tito” Sotto III ang random drug testing sa Senado agud masiguro nga drug-free ang ahensya.
Suno kay Sotto, ini nga programa ginpatuman niya sang 18th Congress sang siya pa ang Senate President, kun sa diin 300 ka empleyado ang ginpaidalom sa surprise drug test kag tanan nagnegatibo.
Pati man ang mga senador nga boluntaryo, negatibo man ang resulta.
Nagtapos ang programa matapos ang iya termino, apang ginpanawagan liwat ini ni Sotto bangud sang imbestigasyon sa isa ka staff ni Sen. Robin Padilla nga ginadudahan nga nagagamit sang ilegal nga droga.
Bisan wala pa sang opisyal nga resulta, ginpabaskug ni Sotto ang importansya sang preventive measures para maprotektahan ang integridad sang Senado.
Ang drug testing kabahin sang kampanya batok sa ilegal nga droga suno sa Republic Act No. 9165, nga naga-allow sang testing sa mga empleyado sang gobyerno.
Nagapati si Sotto nga ang pagbalik sang programa magapataas sang pagsalig sang publiko kag magsilbi nga pahanumdom sa mga magagamit ukon magpasulod sang droga sa Senado.
