KORONADAL CITY – Indi mangin mahapos ang pagsaulog subong sang Ramadan sang mga kautoran naton nga Muslim bangud sa epekto sang COVID 19.
Sa ekslusibo nga interbyu sang Bombo Radyo Koronadal kay South Cotabato Muslim Affairs Chief Mutalib Sambuto, ginpahayag sini nga madayon sa gihapon ang ila pagtililipon apang ila igapatuman ang hugot nga social distancing labi na sa katapusan sang Ramadan.
Mahimo naman suno pa nga indi na magkadto sa mosque ang mga malayo ang panimalay kag ipatigayon na lang ang pagpangamuyo sa tagsa nila ka puloy-an.
Magaumpisa ang oras sang ila pagkaon takna ala-1 sang kaagahon tubtob alas 4 sang aga kag alas 6 sang gab-i.
Ginpakigbahin sini nga ang ginakabig nga “moonsighting” ang ginabantayan sang mga Muslim bangud sa tion nga magguwa ang bulan, didto magaumpisa ang isa ka bulan nga pagpuasa kag paghalad sang pangamuyo.
Ang Ramadan isa sa mga importante nga kasaulogan sa mga Muslim bangud isa ini sa mga pamaagi agud makapamalandong kag magdayaw kay Allah.
