Ginpabutyag sang incumbent Purok Chairwoman sang Purok G Morillo, Barangay Sta. Cruz nga nagbaliskad ang resulta sang eleksyon sa purok matapos mapamatud-an ang presensya sang “flying voters” batok sa iya kontra nga si Romeo Porazo.
Sa interview sang Bombo Radyo Koronadal, kay Liza Humadiao – incumbent Purok Chairwoman sang nasambit nga purok, ginpahayag niya nga ginpatuman ang istrikto nga proseso sa botohan sang Pebrero 28, kun sa diin mga rehistrado nga residente lamang ang ginpasugtan makaboto.
Apang nagguwa ang reklamo nga may mga botante nga indi taga-purok nga naka-partisipar gihapon kag nagdugang sa numero sang boto sang iya kontra.
Bangud sini, nagpasaka si Humadiao sang election protest batok sa iya kasumpong nga si Romeo Porazo.
Sa pagpatigayon sang mga hearing kag pag-abri sang ballot box, nadiskubre nga may 17 ka “flying voters” — 16 halin sa Purok Masipag kag isa halin sa Purok Happy Living.
Ginpahayag man ni Humadiao nga sa inisyal nga numero may 122 ka boto ang kampo ni Porazo, apang ginbuhinan ini bangud sa diskwalipikasyon sang mga boto, nga nagresulta sa iya pagdaog.
Bangud sini, nagpasalamat man si Humadiao sa pumuluyo sang Purok G Morillo sa ila suporta, samtang ginapanawagan niya man sa kampo ni Porazo ang husto nga pagsunod sa legal nga proseso angot sa eleksiyon sa purok.
