KORONADAL CITY – Ginpasakaan na sang kaso ang isa ka pulis nga nakaluthang patay sa kaupod nga pulis sa North Cotabato.
Ini ang ginkumpirmar ni Police Insp Hoslito Patroma, hepe sang Mlang Police Station.
Suno kay Patroma, nagapangatubang sang kaso nga homicide kag frustrated homicide si PO1 Virgil Rivera makaligad sini nga ginluthang-patay si PO3 Lloyd Platoon nga nakadestino sa Aflik Police Community Center sa T’boli South Cotabato.
Nahibaluan nga nagapabilin nga at large si Rivera makaligad nga himuon ang krimen, apang sa tion nga maguwa na ang warrant of arrest batuk diri, pagadakpon sa gihapon ini.
Sa pagkamatuod, nakig-angot na ang kapulisan sa pamilya Rivera agud nga magsungka ini.
Madumduman nga nagluthanganay ang duha bangud sa wala paghangpanay nga nagresulta sa maduguon nga insidente.
