KORONADAL CITY- Nagapadayon sa karon ang imbestigasyon sang Maguindanao PNP sa nagluntad nga pagpang ambush sa isa ka pulis sa Brgy. Galakit, Pagalungan, Maguindanao.
Base sa Maguindanao PNP, ginkilala ang biktima nga si Patrolman Jeniel Gonzalgo, 30 anyos nga residente sang Antipas, North Cotabato nga nakadestino sa Regional Mobile Force Battalion sang PNP-12.
Sa inisyal nga impormasyon, ginasuroy ni Gonzalgo ang dalan sa may Brgy. Galakit sakay sang iya nga multicab sang gulpi na lamang siya nga ginpangluthang sang mga suspek nga ginapatihan nga riding-in-tandem.
Nag-angkon sang madamo nga igo sang bala sa nagkalain lain nga bahin sang iya lawas ang biktima kun sa diin sa karon yara na sa kritikal nga kondisyon.
Narekober naman ang empty shells sang cal. 45 pistol samtang padayon pa nga ginalagas ang mga suspek sa likod sang nasambit nga pagpang ambush.
