KORONADAL CITY- Natalana nga pasakaan sang kaso nga paglapas sa RA 9165 ang isa ka pulis, bata sang anay konsehal sang siyudad sang Koronadal kag 3 ka iban pa makaligad nga maarestar sa ginpatigayon nga separar nga operasyon batuk sa illegal nga droga sa probinsiya sang South Cotabato.
Una nga naaresatr sanday PO1 Romar Magalino Piolo, 28 anyos nga myembro sang Regional Public Safety Batallion (RPSB-12) kag ang pakaisa sini nga si Jerson David Piolo 27 nga mga residente sang Brgy. Libertad, Surallah South Cotabato sa ginpatigayon nga operasyon sa Hotel 105 sa Brgy. Zone 1, Koronadal City kun diin nakuhaan ang mga ini sang sachet sang shabu kag mga drug paraphernalia.
Bangud sini, magapangatubang man sa kaso nga administratibo ang nasambit nga pulis.
Samtang, arestado naman sa separar nga operasyon si Oswell Paclibar Pagunsan 37, bata ni anay Koronadal City Councilor Oscar Pagunsan kag ang live-in partner sini nga si Sheryl Paquera Bulos 25 makaligad ang ginpatigayon nga buy-bust operation sang PDEA 12 kag Tantangan PNP sa New Iloilo, Tantangan South Cotabato.
Nadakpan ang duha matapos nga makigtransaksyon sa PDEA agent agud nga ibaligya ang 1 medium sachet sang shabu sa kantidad nga P1,000.00
Magluwas diri, nakumpiskar man ang 2 dalagko nga pakete sang shabu nga may P15,000 kag mga drug paraphernalia.
Sunod nga naarestar ang isa pa ka ginakabig nga high value target nga si Jeremy Gonzales Sodusta 29, isa ka auto painter kag residente sang Brgy.Cabuling, Tantangan South Cotabato.
Nakig-transaksyon man ini sa PDEA agent kun diin nakuhaan ini sang shabu nga nagakantidad sang P60,000.
Nahibaluan nga sanday Pagunsan kag Sodusta ang yara sa target list sang mga drug personalities kag ginakabig nga high-value targets.
Sa subong, napreso na sa PDEA RO XII detention facility ang mga nadakpan nga durugista.
