KORONADAL CITY-Nagapangatubang subong sang mga kaso ang isa ka aktibo nga miyembro sang Philippine National Police sa banwa sang Polomolok South Cotabato kaupod ang 3 ka mga himata sini bangud sa pag-operate sang cybersex den sa nasambit nga banwa.
Sa ekslusibo nga interbyu sang Bombo Radyo Koronadal kay NBI 12 Regional Director Olivio Ramos, arestado sa ginpatigayon nga raid sanday Jessa Cana Penacerada, Maria Jemma Penacerada Zarate, Guillermo Zarate kag si PO3 Retchie Boy Silot Buca nga aktibo nga miyembro sang Polomolok, PNP.
Imbulbado suno pa ang apat sa cybercrime operations kag child prostitution kun sa diin sa ginpatigayon nga raid, na rescue ang 6 ka mga kababaihan nga nagasirbe nga web cam models nga ginalakipan sang 4 ka mga menor de edad nga naaktuhan pa nga nagapakig video-chat sa mga dumuluong nga mga kliyente nga nakahublas.
Narekober sa operasyon ang mga computer, laptop, webcams, microphones,cellphone, sex toys, make-up kits, bank book, credit cards, mga bastos nga panapton kag iban pa.
Sa karun ginpasakaan na ang mga ini sang mga kaso nga paglapas sa RA 9775 ukon Anti-Child Pornography Act of 2009 kag RA 10175 ukon Cybercrime Prevention Act of 2012 kag dugang nga kaso man kay PO3 Buca bangud sa ginapanag-iyahan sini nga mga indi lisensyado nga mga armas.
