Dead on arrival sa balay bululngan ang isa ka aktibo nga pulis matapos ini nga ginpusil sang iya ugangan nga babayi sa Brgy. Poblacion, Pres. Quirino, Sultan Kudarat.
Ginkilala sang mga otoridad ang biktima nga si Police Staff Sergeant Bobby Nanali, 37 anyos, residente kag Warrant PNCO sang President Quirino PNP.
Sa isa ka interbyu kay Sultan Kudarat Provincial Police Office Director PCol Bernard Lao, antes natabo ang insidente sang pagpamusil-patay, may natabo nga mainit nga pagbinayloay sang pulong sa tunga sang biktima kag sang iya asawa nga nagtuga sang pag-inagawanay sang pusil.
Ginkumpirmar sang asawa sang biktima, nga isa man ka aktibo nga miyembro sang PNP, nga nakuha niya ang pusil kag ginhatag ini sa iya iloy, 60 anyos, nga ara man sa ila balay sang tion sang away.
Dugang pa, nagtuyo ang biktima sa ila garahe pero ginsunod siya sang iya asawa upod ang iya iloy kag nagpadayon gihapon ang away. Dira na ginpahayag nga ginpusil sang iya ugangan ang pulis.
Naigo si Nanali sa likod kag nagtuhaw ini sa iya tiyan.
Gindala pa siya sa ospital pero napatay man gihapon.
Sa subong, yara na sa kustodiya sang Pres. Quirino MPS ang mga suspek kag ginapreparar na ang mga angay nga kaso batok sa ila.
