Nadakpan sa liwat sang Bureau of Immigration (BI) ang isa ka high-profile nga South Korean fugitive nga nakapalagyo lang sang nagligad nga semana.
Suno kay Immigration Commissioner Joel Viado, naaresto liwat si Na Ikhyeon sa Barangay Pampang sa Angeles City, Pampanga samtang ginahimo ang follow-up operation sang BI Fugitive Search Unit sang ahensya.
Upod sa nadakpan sang BI ang isa pa ka South Korean nga wala man nag-ako nga nagbulig agud makapalagyo si Na sa kustodiya sang BI.
Madumduman nga naaresto si Na sang Mayo sang tuig 2023, kag nadelay pa ang deportasyon sini tungod sa kaso nga ginpasaka batok sa iya nga may kalabutan sa estafa.
Samtang, nakapalagyo ang fugitive sang Marso 4 samtang nagatigayon ang hearing sa iya kaso sa estafa.
Nagguwa sa imbestigasyon nga nakapalagyo ang suspek pinaagi sa comfort room sa korte.
