KORONADAL CITY – Gin-skedyul na sang Sangguniang Panlalawigan sang South Cotabato ang public hearing para sa ginaistoryahan nga mainit kag kontrobersiyal nga lifting sang ban sang open pit mining sa probinsiya.
Ini ang ginpahayag ni South Cotabato Vice Governor Vic De Jesus sa eksklusibo nga interbyu sang Bombo Radyo Koronadal.
Suno kay De Jesus, ini ang paagi agud nga mabatian sang mga katapu sang SP ang tanan nga sektor sa ila nga panan-awan sa sini nga issue agud mangin balasehan sang ilan nga desisyon kun magaboto pabor ukon indi sa pag-amendar sang Section 22-B sang Environment Code sang probinsiya.
Dugang pa sang opisyal, kinahanglan nga ipatigayon ang public consultation agud masunod ang proseso bangud “ammendment” ang ginaduso sa proposal nga ini kag indi simple lamang nga pagbag-o.
Sa sini nga paagi, mangin patas ang tanan kag mabatian ang tanan nga bahin.
Nahibaluan nga ang kumbuyuhan sang Saggitarius Mines (SMI) Incorporated ang padayon nga nagapangita sang paagi nga makapadayon sang ila operasyon apang ang Envi Code sang probinsiya lamang ang nagaupang sa ila rason nga ginaduso nila nga mabag-o ini.
Samtang, padayon man ang hugot nga pagpamatok sang simbahan ukon mga religious sector, mga Anti-open pit mining advocates kag iban pa nga matigayon ini.
Sa pagkamatuod may yara sang masobra 100 ka libo nga mag pirma nga natipon ang Diocese of Marbel nga nagapanawagan sa SP nga e-uphold ang Envi Code sang probinsiya.
