KORONADAL CITY – Tigayon na nga ginrelieve sa iya nga post sa provincial capitol sang South Cotabato ang isa ka PSU member nga ginkilala kay PSU Mamon nga bag-o pa gid lamang naassign sa kapitolyo bangud sa ginhimo sini nga pagsita sa driver sang isa ka opisyal sang probinsiya.
Ini makaligad nga nagreklamo si South Cotabato 1st district Board member Noel Escobillo sang ginsita ni Mamon ang driver sini sa pag-parking sa sulod sang capitol ground.
Suno kay PSU Chief Eleuterio Nodado sa interbyu sang Bombo Radyo Koronadal, posible nga may yara lamang sang gamay nga wala paghangpanay sa tunga sang PSU member kag ni Board Escobillo bangud indi pa ini tuman kakilala ang opisyal kag nagsala sa iya nga pagsabat.
Gilayon suno pa ini nga ginkakas sa iya pwesto kag ginsaylo sa breeding center sang probinsya nga nahamtang sa brgy. Tonongcop, Tantangan, South Cotabato.
Madumduman nga nagpabutyag sang kaakig si Board Escobillo sa pagsita sang nasambit nga PSU kag gintawag pa nga arogante si Mamon.
