Mas ginpabakod sang Provincial Security Unit (PSU) sang South Cotabato Provincial Capitol ang monitoring sa paggamit, pagtipig kag pagdumala sang mga armas nga gin-isyu sa security personnel agud malikawan ang aksidente kag indi awtorisado nga paggamit sini.
Sa interview sang Bombo Radyo Koronadal kay Eleuterio Nodado, Security Officer IV kag PSU Chief, ang mga armas nga gin-isyu sa mga security personnel ginatugyan lamang para sa ila duty kag kinahanglan i-turn over pagkatapos sang ila duty.
Ginpahayag ni Nodado nga ginatipigan ang mga firearms sa designated cabinet kag ginapatuman ang husto nga safety procedures sa tanan nga security personnel.
Kabahin sa ginapahanumdom sa mga security personnel ang paglikaw sa indi kinahanglanon nga pag-handle sang armas kag ang pagpraktis sang alertness sa tanan nga tion.
Indi man dapat himuon nga hampangan ang armas agud malikawan ang insidente.
Suno sa iya, nagapatigayon ang PSU kada tuig sang training sa husto nga firearms handling, inspection, safety procedures kag practical shooting bilang kabahin sang pagpalig-on sang kahandaan sang mga security personnel.
Gin-awhag man niya ang mga tag-iya sang armas nga siguruhon nga kompleto kag updated ang ila firearms documents kag lisensya agud malikawan ang posible nga legal nga problema.
