Ginatutukon naman sa karon sang kapulisan ang pagbuhin sang ila timbang ilabi na sa mga overweight nga mga opisyal kag mga katapo sang kapulisan.
Suno kay Police Colonel Samuel T. Cadungon, Provincial Director sang South Cotabato Police Provincial Office, sa isa ka interbyu sa Bombo Radyo Koronadal, kabahin ini sang inisyatibo ni Police General Nicholas Torre III nga suno pa mangin mas madasig ang ila response time kag epektibo ang hulag sang kada isa sa tunga sang operasyon.
Ginpahayag niya nga mas preparado kag mas abtik nga lawas ang kinahanglanon sa serbisyo sang kapulisan, ilabi na kon may emerhensya.
Dugang ni Cadungon, bukas naman ang opisina sa “official weigh-in” para sa mga overweight nga personahe, kag ginahingyo ang tanan nga mag-upod sa panawagan para sa disiplina sa timbang kag lifestyle.
Ginpasiguro ni Cadungon nga ini nga kampanya wala sang ginapaburan kag wala man sang gina-discriminate.
Tanan nga pulis, regardless sang ranggo, ginahingyo nga mag-upod sa challenge sa pagpabaskog kag pagpaayo sang lawas.
Ang inisyatibo may tinutuyo nga indi lang pagpabaskug sang lawas kundi pagpabaskug man sang moral kag performance sang kapulisan para sa mas maayong serbisyo sa pumuluyo.
