Wala pa sang kumpirmasyon may kaangtanan sa isyu nga nagalapta sa social media angot sa pagpabakuna sang anti-tigdas.
Ini ang nangin pahayag ni Wendell Joe C. Donguines, RMT,MSPH-HA Prov. HEPO, Sultan Kudarat, sa interview sang Bombo Radyo Koronadal.
Suno kay Donguines, wala pa sang kumpirmasyon halin sa ginkananan kag balay-bululngan sa kamatuoran angot sa nagalapta nga isyu sa bakuna batok sa tigdas.
Sandig sa imbestigasyon sang probinsya, wala sang kamatuoran ang mga nagalapta nga isyu sa social media angot sa MR vaccine bangud wala man sila nakabaton sang bisan ano nga kaso ukon reklamo halin sa mga nabakunahan sang nasambit nga vaccine.
Gindugang pa niya nga madugay na nga gina-usar ang nasambit nga vaccine sa diin nakabakuna na sila sang masobra 62,000 ka mga bata kag wala sang bisan isa nga nakabatyag sang mga sintomas kasubong sang mga gin-post sa social media sang pila ka mga indibidwal.
Nagpanawagan man si Donguines sa mga ginikanan nga buligan ang gobyerno sa ila kampanya batok sa tigdas.
