KORONADAl CITY – Pagahatagan sang pagkilala ang provincial government sang South Cotabato si PFC Mark Darell Parba alyas “jingle” nga napatay sa military operation batuk sa Maute group sa Marawi City.
Ini ang ginpasiguro ni Governor Daisy P. Avance Fuentes sa interbyu sang Bombo Radyo Koronadal.
Suno kay Fuentes,kinahanglan mahatagan sang pagkilala ang ginhimo nga sakripisyo ni Parba agud nga pakigbatuan ang ginhimo nga teroristic attack sang Maute group.
Kaangot sini, magahatag sang P50,000 nga financial assistance ang provincial government bilang bulig sa pamilya Parba magluwas pa sa pauna nga bulig nga nahatag na.
Nagpasalamat naman ang pamilya Parba sa ginpahayag ni gobernador bangud mabudlay lamang ang mga ini kag dako ang buliga ng ginhatag sang probinsiya.
Nahibaluan nga si PFC Parba ang nagatindog nga bread winner sa ila nga pamilya kun diin siya ang nagapatuon sa mga utod sini.
Sa subong, wala pa nadesisyunan sang pamilya kun san-o ilubong si PFC Parba.
