KORONADAL CITY– Nagresulta sa suspension sang 1 ka College Professor sa China ang ginahimo sini nga pinal nga eksaminasyon sa iya nga mga estudyante.
Ginpa-inom lang naman ni Prof Gu Ming ang iya nga mga students sang tag-isa ka baso nga Baiju, isa ka tuman ka isog nga sahi sang makahulubog nga ilimnon nga may yara sa 40-80% alcohol.
Photo Credits: Google
Nahibaluan nga tradisyunal Chinese Medicine ang ginatudlo ni Prof Ming sa Guizhou Anshun Vocational Institute kag suno sa maestro, ginpa-inom nya ang iya nga mga estudyante agud nga mangin preparado suno pa ang mga ini para sa mga pagtilaw kag paghangkat sang kinabuhi.
Kag ini suno pa ang nahun-hunaan sini nga mangin final exam sang mga bata.
May yara man gani sang puntos nga ginhatag ang manunudlo base sa kun ano kadamo ang maubos sang estudyante.
Ginhatagan gani ni Prof Ming sang perfect score ang mga naka-ubos sang 1 ka baso nga Baiju samtang yara naman sa 90 ang score sang mga naka-inom sang tunga sa baso.
60 points naman para sa mga lam-ok lang ang masarangan kag failure naman kun wala gid mag-inom ang isa ka estudyante.
Bangud sini, gin-ekspektar nga madamo sang mga nakakuha sang mataas nga puntos sa klase sang professor apang madamo naman sang mga nasapwan nga hubog sa ila nga campus.
Kaangot sini, wala nalipay ang Deputy Director sang buluthuan kag gilayon nga ginsuspender ang manunudlo.
