Gindesignar bilang Officer-in-charge sang Police Regional Office 12 si PBGen. Arnold Casingal Santiago makaligad nga ginpapanaugan sang NAPOLCOM si former CIDG Chief kag PRO12 Director BGen. Romeo Macapaz sang 90-day preventive suspension bangud suno pa sang alegasyon nga nagpangtamper ini sa imbestigasyon sang nagkaladula nga manugbulang sa bahin sang Batangas.
Kaangot sini,nagpahayag sang preparasyon nga magsabat si anay Criminal Investigation and Detection Group (CIDG) Director kag subong nga SOCCSKSARGEN Regional Director PBGen. Romeo Macapaz Jr. matapos siya napatawan sang tatlo ka bulan nga suspensyon sang National Police Commission (NAPOLCOM).
Sa isa ka text message, ginpahayag ni Macapaz nga ginahatagan niya sang respeto ang desisyon sang komisyon kag ginabaton man niya nga siya ang magapaidalom sa isa ka preventive suspension.
Suno sa iya, bilang kabahin man sang proseso sang NAPOLCOM, preparado siya nga atubangon kag sabton ang tanan nga alegasyon nga ginahaboy sa iya sang Patidongan Brothers.
Madumduman nga nagpasaka sang kaso ang mag-utod nga sanday Julie kag Elakim Patidongan sa opisina sang NAPOLCOM bangud sa alegasyon nga ginkuha ang ila mga personal nga cellphone, gin-delete kag ginkuha ang mga importante nga impormasyon nga mahimo tani makabulig sa pagsulbad sang kaso sang mga nadula nga mga sabungero.
Samtang, base sa resolusyon sang komisyon, nakita nga may mabakod nga basehan ang mga alegasyon batok kay Macapaz, rason nga siya ginpasakaan sang 90 ka adlaw nga suspensyon.
Ginpasiguro naman sang NAPOLCOM nga ang imbestigasyon magalabay sa husto nga proseso kag ang tanan nga respondents pagahatagan sang tsansa para sa due process.
