Ginpanindugan sang isa ka priso sa USA nga naserbe na sini ang iya life imprisonment matapos sia nga napatay kag na-revive lang sang mga doktor.
1997 sang napriso si Benjamin Schreiber bangud sang kaso nga murder apang nabutang sia medical emergency sang 2015, sa diin nadula na ang pagginhawa sini.
Matapos ang lima ka beses nga pag-resuscitate, na-revive sang mga doktor si Benjamin.
Apang ang pagbutang sang iya kabuhi sa ital-ital, gingamit niya nga rason agud makagwa sa prisuhan.
Suno sa iya, kon wala sia ginluwas lang sang mga doktor, napatay na kuntani sia gani nga natapos na man ang iya life sentence.
Nagtuga sang kontrobersiya sa laye kag debate sa publiko ang amo nga kaso.
Sang ulihi, nadesisyunan sang Korte nga tubtob buhi si Benjamin, priso gihapon ini nga wala sang parole kag hilwayon lang kon opisyal na sia nga gindeklara sang doktor nga patay na.
