Wala lamang naghatag sang signos ang former beauty queen nga si Priscilla Meirelles nga malapit na lang sila magbulagay sang iya bana nga si John Estrada, kundi maisog pa sini nga ginpangalanan kun sin-o nga babaye ang kaupod sang 51-anyos nga actor samtang yara sa Boracay.
Nagguwa ini nga isyu sang nag-post si Estrada sang mga laragway sini sa Instagram nga may caption nga “What an awesome place.”
Sunod nga nag-komento ang isa ka social media user: “Sino kasama mo rigoooor? Si lena or marites?” Ginatumod sang netizen ang papel ni Estrada bilang si Rigor sa “Batang Quiapo” kun sa diin sanday Lena kag Marites naman ang ginadala sang aktres nga sanday Mercedes Cabral kag Cherry Pie Picache.
Diri kag nag-reply ang asawa ni Estrada: “Si @ Lily Hallman_”.
Wala pa nakuntento si Priscilla kag nagdugang pa gid sa iya komento, “Looking very divorced Mr. Estrada.”
Sa subong, gin-off na sang actor ang comment option sa iya post apang madamo na ang naka-screenshot sa komento sang iya asawa nga isa ka Brazilian model kag television host.
Sang 2023, matandaan nga gin-ako ni Priscilla nga may mga pagpangkat sa ila relasyon ni Estrada nga ginsundan pa gid sang iya cryptic posts nahanungod sa cheating allegations.
Isa sa iya post ang nagtatak sa iya followers: “What to call a female that entertains married man?” kag “Married men/women who chase single boys/girls are seriously so pathetic!”
Sunod sini nga ginklaro nga indi cryptic ang iya posts kundi “very direct to the point.”
Matandaan nga ginkasal sanday Estrada kag Priscilla sa La Union sang 2011 kag may isa sila ka anak nga babaye.
