KORONADAL CITY- Posible nga madugangan pa ang numero sang mga patay sa nagluntad nga mass shooting sa duha ka mga moske sa Christchurch, New Zealand.
Suno kay Bombo International Correspondent Rosalie Romagos Pritchard na taga Brgy. Zone III Koronadal City apang 13 ka tuig na sa Dunedin, New Zealand, luwas sa 49 nga patay yara naman sa Intensive Care Unit o ICU ang 12 ka persona nga nag angkon sang malala nga mga igo sa bala.
Dugang pa sini nga ginapakakas naman sa karun sang gobyerno sang New Zealand ang mga aktwal nga videos sang mass shooting makaligad ini maglapta sa social media.
Nahibaluan nga nahimo pa nga i-live stream sang prime suspect nga si Brenton Tarrant, 28 anyos, nga isa ka Australian national ang iya ginhimo nga krimen samtang naga soundtrip.
Dugang pa ni Pritchard nga una nga target ni Tarrant ang lugar sang Dunedin base sa mga naga gwa nga imbestigasyon apang nagbag-o ang iya huna huna kag didto sa Chrischurch naghimo sang krimen.
Isa man suno pa ka racist ang suspek kag dako ang kaakig sa mga Muslim.
Sa karun pila sa mga napatay ang wala pa nalubong base sa tradisyon sang Muslim bangud padayon pa nga gina identify sang ila mga pamilya.
