KORONADAL CITY- Nadakpan naman sang mga otoridad ang prime suspect sa pagpanglugos kag brutal nga pagpatay sa isa ka Grade 3 pupil sa banwa sang Tboli, South Cotabato.
Ini ang ginkumpirmar ni Mayor Dibu Tuan sa interbyu sang Bombo Radyo Koronadal.
Ginkilala lamang ang naaresto nga isa ka alyas Sonny, yara sa legal nga edad kag residente man sang nasambit nga banwa.
Suno kay Mayor Tuan, lubos niya nga ginkaakig ang nasambit nga hitabo bangud inosente nga bata ang biktima rason nga pagasiguraduhon ini nga mahatagan sang hustisya ang kamatayon sini.
Dugang pa ni Tuan, personal niya nga ginmandu sa mga otoridad ang pagtutok sa kaso agud nga mapasabat ang mga ini.
Madumduman nga kahapon, una na nga nadakpan sang mga otoridad ang 4 ka menor de edad nga naghimo sang krimen.
Tubtob sa subong nagabubo ang pagpalab-ot sang simpatiya kag kasubo sang mga pumuluyo sang South Cotabato sa pagkamatay sang biktima.
Dako naman ang pagpati sang mga otoridad nga bunga sang iligal nga droga ang nasambit nga krimen bangud wala sa insakto nga panghunahuna ang naglugos kag patay sa biktima bangud ginkuha pa ang mga internal organs sini.
