Posible nga magsaka sang tubtob P4 kada litro ang presyo sang diesel sa masunod nga semana, samtang posible man nga magnubo ukon magsaka ang presyo sang gatong, suno sa isa ka source sang oil industry.
Base sa hulag sang Mean of Platts Singapore ukon MOPS kag sa average nga exchange rate sang piso kontra dolyar halin Hulyo 6 tubtob Hulyo 9, 2026, ginapaabot ang dako nga pagbag-o sa presyo sang mga produktong petrolyo.
Posible nga magsaka ang presyo sang diesel sang P2 tubtob P4 kada litro.
Sa bahin naman sang gasolina, posible ang rollback nga P1 kada litro ukon pagsaka man sang tubtob P1 kada litro.
Suno sa source, nagapabilin nga mataas ang presyo sang diesel kag iban pa nga middle distillates bangud sang padayon nga mabaskog nga demand kag limitado nga suplay sa merkado.
Gindugang pa nga posible nga magnubo ang suplay sang diesel halin sa Russia bangud sang mga danyos sa imprastraktura sang enerhiya tuga sang mga pag-atake.
Ginalauman man nga magapadayon ang pagsaka sang presyo sang krudo bangud sang mas mataas nga demand sa panahon sang tag-init sa Northern Hemisphere kag sang mga limitasyon sa suplay bangud sa maintenance sang produksiyon sang pila ka mga refinery.
Ginlauman nga igaanunsyar sang mga kumpanya sang gatong ang bag-o nga price adjustment sa Lunes kag igapatuman sa Martes.
