KORONADAL CITY – Pilason ang isa ka preso sang South Cotabato Provincial Jail matapos nga maigo sang M-16 armalite rifle sang on-duty nga Jail guard nga nag-warning shot.
Sa interbyu sang Bombo Radyo Koronadal kay Jail Warden Felicito Gumapac, aksidente lamang ang pagkaigo sa hita sang preso nga si Mutalib Usman Aliman nga residente sang Midtimbang, Maguindanao kag may kaso nga 15 counts sang Violation sa Sec. 15 kag 11 sang RA 9165 ukon illegal nga droga.
Suno kay Warden Gumapac, indi riot ang natabo sa sulod sang Jail kundi warning ukon paandam lamang ang ginhimo sang Jail guard apang bangud nga wala ginalauman ang pag-igo sa matig-a nga butang sang bala sang M16 naigo ini sa hita sang preso.
Depensa man sang Jail Guard nga si Ronnelio Gazo, aga pa lamang kaina sang nagapasaway na ang mga preso rason nga makapila ka beses niya ini nga ginasaway apang pag-abot sang hapon amo sa gihapon ang natabo.
Kag agud nga magpabilin sa ila nga selda ang mga preso bangud sa report nga may ginahaboy nga mga droga sa pader, nagpalupo ini apang aksidente nga naigo si Aliman.
Gilayon naman nga gindala sa South Cotabato Provincial Hospital si Aliman nga ginabulong na sa karon.
Ginpasiguro naman ni Warden Gumapac nga magapatigayon sang imbestigasyon sa natabo kag temporaryo man anay nga iga-relieve sa iya pwesto ang Jail guard.
