Pabor si Pangulong Ferdinand Marcos Jr. sa plano sang mga mamalidha nga busision ang flood control projects sang gobyerno matapos ang nagluntad nga malapnagon nga pagbaha dala sang bagyo Kristine.
Suno kay Marcos, wala ini sang nakita nga problema sa plano nga pagbusisi sa nasambit nga mga proyekto.
Apang suno sa punong ehekutibo nga kinahanglan lantawon nga may yara sang flood control projects kag wala sini masarangan ang tuman ka dako nga volume sang tubig baha.
Nagalaum ini nga mahangpan sang publiko nga indi lamang budget kag proyekto ang problema, kundi amo nga mahangpan ang siyensya sa nagakatabo sa karun sa pungsod.
Matandaan nga una na ginpahayag ni Senate President Francis “Chiz” Escudero nga kwestyunon sang Senado ang mga ahensiya angut sa pundo nga gin-alokar sa flood control projects sa mga lugar nga ginsul-ob sang tubig baha.
