Padayon kag hapsay ang preparasyon para sa masadya nga selebrasyon sang ika-59 nga Foundation Anniversary sang South Cotabato kag 26th T’nalak Festival subong nga Hulyo, suno sa Provincial Information Office.
Suno kay Krez Cabaylo, Information Officer sang South Cotabato Provincial Office, “so far so good” na ang estado sang preparasyon, kag in place na ang kadam-an sang mga aktibidad nga kabahin sang piyesta.
Isa sa mga highlight sang imbukada amo ang launching sang Nutrition Month, nga ginalauman nga magahatag importansya sa nutrisyon kag ikaayong lawas sang mga pumuluyo.
Ginpaathag ni Cabaylo nga masadya kag makalingaw nga mga kalihukan ang ginpreparar para sa mga pumuluyo, lakip na ang: Dance competitions , Food strips sa bahin snag Alunan Avenue , Freedom Night para sa LGBT community , Singing competitions kag iban pa nga mga aktibidad nga dapat bantayan.
Ginalauman nga magatambong ang madamo nga bisita halin sa nagkalain-lain nga lugar, kag ginapanigurado sang probinsya ang kalinong, seguridad, kag organisado nga dalagan sang mga aktibidad sa bilog nga semana sang selebrasyon.
