KORONADAL CITY – Pormal na nga ginpatuman subong nga adlaw ang pre-emptive lockdown sa bug-os nga probinsya sang South Cotabato, bilang tikang batok sa pamahog sang coronavirus disease (Covid-19).
Base ini sa ginpaguwa nga executive order (EO) no. 17 ni Governor Reynaldo Tamayo Jr, nga nagaamiyendar sa EO No. 15.
Sa nasambit nga kamandoan, kalakip sa nakapagkit diri amo ang pagdumili sa mass gatherings, pagpresentar sang mga dokumento kun magaagi sa probinsya, pagdumili sa mga 15 anyos panubo nga maglagaw, pagpatuman sang curfew hours halin alas 7 sang gab-i tubtob alas 5 sang aga, kag tanan nga mga government tourism destinations kasubong sang Seven falls sa Lake Sebu, ang South Cotabato Sports Complex, kag ang South Cotabato Gymnasium and Cultural Center ang suspendido.
Ginpasiguro naman sang South Cotabato Provincial Government nga ginahimo nila ang nagakaigo nga aksyon agud mapunggan ang pagkalaton sang sin-oman sa nasambit nga virus.
