Ginpahayag sang Department of Energy (DOE) nga mahimo nga magtaas ang presyo sang mga produktong petrolyo sa masunod nga semana sa pihak sang gamay nga epekto sang kinagamo sa Middle East sa pangkalibutanon nga supply sang langis.
Suno kay Rino Abad sang DOE Oil Industry Management Bureau, wala sang ginreport nga nagkalaguba nga mayor nga pasilidad sang langis sa Iran matapos ang pag-atake nga imbolbado ang Estados Unidos kag Israel.
Nagakahulugan ini nga wala sang direkta nga pagkatublag sa produksyon sang langis.
Apang ginpahayag sang DOE nga may mga shipping companies nga nagpabutyag sang kahangawa bangud nagahinay ang transportasyon kag delivery sang langis.
Bilang resulta,mahimo magtaas ang presyo sang langis sa pangkalibutanon nga merkado sang $5 tubtob $10 kada barrel, nga mahimo magresulta sa pagtaas sang mga P3 kada litro sa mga gasolinahan.
Ginpasalig sang DOE nga wala sang ginalauman nga kakulangan sa supply sang langis sa pungsod.
Mahimo ipatuman sa masunod nga inadlaw ang pag-adjust sang presyo sang petrolyo.
